مراسلنا الخاص من العيون بلا ما يتحرك من الكنبة
فمشهد مؤثر، بدا موظفو بعثة المينورسو كيجمعو حوايجهم بعد 35 عام ديال “المراقبة”. موظف سويسري، سميتو جان-بيير (اسم مستعار باش ما يتحرجش)، صرح لينا وهو كيلوّح دموعو: “جيت فـ 1991 نقضي ستة شهور.. دابا عندي حفيد كيهضر الحسانية وكيعرف يصاوب أتاي حسن مني”.
ولكن المفاجأة الكبرى لقيناها فباليزتو: قفطان منصوري بالسفيفة والعقاد، شراه لمراتو كتذكار.
سولناه علاش بالضبط المنصوري؟ جاوب: “قالو ليا فالقيسارية هاد الموديل كيتلبس فالانتصارات..
وأنا ما فهمتش التلميح حتى البارح”.
المعلم الخياط يدخل على الخط…
المعلم بوشعيب، خياط تقليدي فدرب السلطان، أكد لينا أن الدبلوماسية المغربية والقفطان المنصوري عندهم نفس السر: “الصبر. السفيفة ما كتخدمش فنهار، والعقاد كيتشد واحد بواحد.. وحنا شدينا 35 عام عقدة بعقدة..
دابا القفطان كمل ولا بقى غير المضمة”.
وزاد المعلم بلهجة حادة: “أما شي وحدين كانو كيطلبو كل عام تمديد تقني.. هادشي عندنا كيتسمى الكليان اللي كيقول ليك زيد ليا غير شي سيمانة وما عمرو كيجي ياخد سلعتو”.
أزمة الطوموبيلات البيضاء
السؤال الكبير دابا عند المواطنين: فين غادي يمشيو داك الأسطول ديال الطوموبيلات البيضاء؟
نكافة من العيون اقترحات تحويلهم لموكب العرايس: “بيضين، كبار، ومتعودين يدورو فالبلاد بلا ما يديرو والو.. كيصلحو للزفة”.
نيويورك فحالة طوارئ..
فالأمم المتحدة، الموظف المكلف بكتابة التقرير السنوي دخل فأزمة نفسية. مصدر مطّلع أكد لينا أن التقرير كان كيتكتب بنفس الطريقة كل عام: كيحلّو تقرير العام اللي فات، وكيزيدو جملة “يعرب الأمين العام عن قلقه”. دابا ما بقاش عندو ما يعرب عليه، وكيفكر يتعلم الطرز الرباطي باش يدوز الوقت.
حتى المحللين ديال القنوات اللي عاشو 35 عام على تحليل “الفقرة السابعة من القرار” ولّاو عاطلين، وكيفكرو يتحولو لنقاد موضة فعروض القفطان.
الفيسبوك يعلن نفاد المخزون..
أما صفحات “عاجل، فقد أعلنت رسمياً نفاد مخزونها من الإيموجي، بعدما استعملت عبارة “الضربة القاضية” للمرة 47 هاد العام. وقررت إدارة الفيسبوك إضافة إيموجي جديد خاص بالمغاربة..
فعيد الوحدة، العيالات خرجو القفطان المنصوري من الدولاب، والرجال خرجو الجلابة، والجدة فاطمة سولاتنا شنو واقع، شرحنا ليها القصة كاملة، فجاوبات وهي كتصب أتاي: “35 عام؟ وأنا كنحسابهم ضياف جاو غير فالصيف.. ا
لله يسهل عليهم، وخليوهم ياخدو معاهم شي حلوة للطريق”.

جاد مصلح